Crónica de la tercera reunión del Atenéu
Ayeri, llunes 15, en rempuesta a la convocatoria pa Asamblea fecha el día de la película, xuntémonos dellos componentes de l’Atenéu que, anque al final yéremos ocho o nueve, visto que tábemos pocos decidimos nun celebrar la Asamblea y dir apuntando asuntos que hai que tratar na prósima convocatoria que el día 26, co la ocasión del debate sobre Alternativa libertaria, aprovecharemos pa decidir cuándo la vamos facer.
Los asuntos que surdieron , que acordemos sacalos ena llista correos pa que ca danquién que i pete vaiga rucándolos na mollera, son los que van darreu:
- La toma de decisiones nel Atenéu: acuerdos por unanimidá mediante consensu.
- El idioma na publicación de los comunicaos de l’Atenéu. Trátase namás de plantegar la custión porque la decisión podrá tomase con meyor criteriu depués del debate previstu pa xineru sobre’l tema de les llingues amenorguiaes.
- Necesidá del nomamientu de responsables o coordinadores de les cargues que van surdiendo, por poner: la propaganda.
- La propaganda:
- Medios a utilizar (por carteles, por internet…)
- Conteníos (les pelis: poner la sinosis o destacar los elementos de debate…)
- Responsables d’iguala: diseñu, repartu…
- El blogu (o bloxe, o blox, o blog) y la llista de correos: usu de ca mediu, qué ye lo propio de uno y l’otro.
- Relaciones con otros Atenéos Llibertarios.
Acerque de to ello tuvimos caciplando entre nós pa dir atalantando les diverses posiciones, y ya pacia’l final deleitémonos con un interesante alderique so les relaciones presenciales, cara a cara, o bien al través de l’usu de les ferramientes que posibilita l’interné, que igual cualquier día fáise asuntu de debate xeneral.
Pos esto ye to, tal como yo lo apunté. Vémonos el 26, a les siete, remembrándovos que nel blogu hai ya alguna aportación al tema de la Alternativa Llibertaria que podeis consultar y que danquién que se i escurra puee facer dalguna más.