Sobre el debate "Movimientu llibertariu y cuestión llingüística n'Asturies"
L’alderique que se fexo l’utru día dexo a les clares que nun foi namás que un puntu d’arranque y que l’asuntu va tener que deseguir siendo confrontáu. Ver veremos el cómo lo vamos facer. Pero pámique que lo que tenemos más a la man ye dir aportando documentos y trabayos –o trebeyos- que tean a la tema y podian tener porgüeyu abondo. Pa ello pámique el bloxe ye el sitiu más afayaízu y quiero axuntar a lo ya encolingao los documentos que mandé como archivos axuntaos a la llista correos.
Son, un llamamientu del Stu. Enseñanza d’Uviéu dallá de metanes los ochenta, dende el mesmu Movimientu Llibertariu n’Asturies. Espero poder aportar dalgún otru de los muy escasos que hai desta mena.
Depués aporto otros que, anque non dende’l ámbitu llibertariu, enfrenten la cuestión llingüística en sí y que resulten pamidea nesi sentíu bien útiles. Eso nun quier dicir que yo tea acorde co lo que planteguen; hai delles coses que refugo dafechu, pero el so valir ye que sitúen, que cinquen con mui bon güeyu les coordenaes de l’asuntu nestos tiempos.
Dellos son de la Fundación Caveda y Nava (FCyN) que se propón, asegún declaración propia, abordar la cuestión dende planteamientos de moderación y alcuentru de posiciones. Pámique son peradecuaos pa la fin desti debate. Anque puedan paecer daqué llargos tienen párrafos muy útiles (la mayor parte) que insisto en recomendar cháios una güeyá.
Finalmente y non menos interesante, les palabres del poeta. Nesti casu Constantino Cabal, que vivió l’entamu de les boquiaes del bable (años cuarenta y cincuenta del sieglu venti) al que él echói fuelgu abondo pa que podiere espurrir la vida hasta que llegare l’álitu del surdimientu allá pe los setenta, que ye lo que mos truxo hasta equí. Porque la llingua “no es toda proyección de aristas de fonética punzante”. Estes pallabres del prólogu y epílogu -iguaos en castellán- a la so única obra en balble “L’alborá de los malvises” son tamién recomendables enforma pa otra güeyá de la cuestión que apela más al sentimientu y lo afeutivo implícito na llingua.
Gelín Fdz. Meana